Слоўнік Піскунова. Першыя ўражаньні-2: "Паяжджане"

Узяў Купалавых "Паяжджанаў" і паглядзеў, як прадстаўлена радзейшая лексыка адгэтуль у ВСБМ.

паяжджане -- ёсьць
папаўзуха -- ёсьць (завіруха, завея)
злыбядухі няма (але ёсьць злЫбеда і злыбядА, адсылаюць адна да адной, першая з пазнакай "фальк.", другая -- без)
заломна -- ёсьць
упыньне -- ёсьць
дняваньне -- ёсьць
беспрыстаньня няма
праслух -- ёсьць
прагледу няма (ёсьць прагляд)
прасьвет -- ёсьць
зацьмішча -- ёсьць
дудаграй -- ёсьць (музыка-дудаграй)
лазам -- ёсьць
патароча -- ёсьць
пасядухі няма, ёсьць пасядушкі*
закосьніца ёсьць, закосьні няма
прытульна -- ёсьць
прыкаросьніць няма
збеядухі няма
хустаць няма
вехі няма

Застаецца ўражаньне непасьлядоўнасьці. З аднаго боку, выглядае, што пры ўкладаньні тэкст або ўлічваўся, або ўжывалася крыніца, дзе ён улічаны: "дудаграй" праасацыяваны з "музыкам", як і ў Купалы; "папаўзуха" тлумачыцца як "завіруха, завея" -- у Купалы яна з "завірухаю" праз злучок. Але няма 9 словаў: злыбядуха, беспрыстаньне, праглед, пасядуха, закосьня, прыкаросьніць, зьбеядуха, хустаць, веха. Відаць, усё ж сам тэкст у той корпус, на падставе якога рабіўся слоўнік, не ўваходзіў. (Альбо ўваходзіў, але гэтыя 9 словаў не прайшлі ў рэестр як занадта рэдкія?)

Бонус: сэканоміць ёсьць, зэканоміць няма.