Еклесиастес царя Саломона: Глава 3
Jul. 7th, 2005 04:18 am![[personal profile]](https://www.dreamwidth.org/img/silk/identity/user.png){kind=small}
miramГлава 3
Иже вси речи, еже суть на свете, час свой имеють и часом своим минаются, и господь бог все учинил красно в час свой, и о единаковом конци всякого животного на свете
3:1 Вси речи час имають, и своим замереным бегом минаются вси речи под солнцем.
3:2 Час нарожению, час смерти. Час насадити и час выкопати насаженное.
3:3 Час убити и час уздравити. Час разрушити и час сооружити.
3:4 Час плачу и час веселия. Час тужения и час скакания.
3:5 Час розметывати камение и час собирати е. Час обнимания и час отдалятися от обнимания.
3:6 Час изыскати а час истратити. Час соблюсти и час покинути.
3:7 Час розодрания а час исшития. Час молчания и час молвения.
3:8 Час милости и час ненависти. Час войны и час миру.
3:9 И что ж тогда имать человек излишку со всее праци своея?
3:10 Видел есми мучение, еже дал бог сыном человеческым, абы ся розширили в нем.
3:11 Вси речи добрые учинил ест в час свой, и свет поддал ест гаданию их, абы не познал человек дела, еже уделал бог, от зачала даже до конца.
3:12 И познал есми, иже несть лепшего, токмо веселу быти и чинити добрая дела за живота своего.
3:13 Всякий убо человек, он же ясть и пиеть и видить добрая дела со всего тружания своего, то ест дар божий.
3:14 Познал есми, иже вся дела, яже учинил бог, пребывають вовеки. Не можем ничего ж придати и ни отняти к тым речам, еже сотворил бог, а то абы ся бояли его.
3:15 Что учинено ест, то пребываеть, которые же речи прийдущие суть, уже были суть. Бог направляеть тое, что уже было проминуло.
3:16 Видел есми под Солнцем на месте суду немилость, и на месте справедливости несправедливость.
3:17 И рекох во сердци своем: праведнаго и нечестиваго судити будет господь, и час каждое речи тогда будет.
3:18 И рекл есми в сердци своем о сынех людъскых, абы искусил их бог и указал, иже суть подобни скотинам.
3:19 И прото единакова ест погыбель человечия и скотины, и ровно обоих приключение. Яко умирает человек, тако и скот мреть, по тому ж и дышуть. И ничто же имать человек более над скотину. Вси речи подданы суть суете,
3:20 и вси идуть на единое место. Из земли вся суть, и в землю вкупе ся обратять.
3:21 Кто то весть, иже въступил дух сынов Адамовых к горе, и ступил дух скотиный низу?
3:22 И познал есми, иже ничто есть лепшего, токмо веселитися человеку в деле своем, и тое абы имел за долю свою. И кто убо его к тому приведеть, дабы по собе будущие речи познал?
Иже вси речи, еже суть на свете, час свой имеють и часом своим минаются, и господь бог все учинил красно в час свой, и о единаковом конци всякого животного на свете
3:1 Вси речи час имають, и своим замереным бегом минаются вси речи под солнцем.
3:2 Час нарожению, час смерти. Час насадити и час выкопати насаженное.
3:3 Час убити и час уздравити. Час разрушити и час сооружити.
3:4 Час плачу и час веселия. Час тужения и час скакания.
3:5 Час розметывати камение и час собирати е. Час обнимания и час отдалятися от обнимания.
3:6 Час изыскати а час истратити. Час соблюсти и час покинути.
3:7 Час розодрания а час исшития. Час молчания и час молвения.
3:8 Час милости и час ненависти. Час войны и час миру.
3:9 И что ж тогда имать человек излишку со всее праци своея?
3:10 Видел есми мучение, еже дал бог сыном человеческым, абы ся розширили в нем.
3:11 Вси речи добрые учинил ест в час свой, и свет поддал ест гаданию их, абы не познал человек дела, еже уделал бог, от зачала даже до конца.
3:12 И познал есми, иже несть лепшего, токмо веселу быти и чинити добрая дела за живота своего.
3:13 Всякий убо человек, он же ясть и пиеть и видить добрая дела со всего тружания своего, то ест дар божий.
3:14 Познал есми, иже вся дела, яже учинил бог, пребывають вовеки. Не можем ничего ж придати и ни отняти к тым речам, еже сотворил бог, а то абы ся бояли его.
3:15 Что учинено ест, то пребываеть, которые же речи прийдущие суть, уже были суть. Бог направляеть тое, что уже было проминуло.
3:16 Видел есми под Солнцем на месте суду немилость, и на месте справедливости несправедливость.
3:17 И рекох во сердци своем: праведнаго и нечестиваго судити будет господь, и час каждое речи тогда будет.
3:18 И рекл есми в сердци своем о сынех людъскых, абы искусил их бог и указал, иже суть подобни скотинам.
3:19 И прото единакова ест погыбель человечия и скотины, и ровно обоих приключение. Яко умирает человек, тако и скот мреть, по тому ж и дышуть. И ничто же имать человек более над скотину. Вси речи подданы суть суете,
3:20 и вси идуть на единое место. Из земли вся суть, и в землю вкупе ся обратять.
3:21 Кто то весть, иже въступил дух сынов Адамовых к горе, и ступил дух скотиный низу?
3:22 И познал есми, иже ничто есть лепшего, токмо веселитися человеку в деле своем, и тое абы имел за долю свою. И кто убо его к тому приведеть, дабы по собе будущие речи познал?
