Цюркскае

Пэрыядычна трапляюцца зьвесткі, быццам усе цюркскія мовы больш-менш узаемазразумелыя. Напрыклад, што на нейкім панцюркісцкім зьезьдзе, дзе ўсе гаварылі на сваіх мовах, толькі якуцкая прамова вымагала перакладу. Альбо яшчэ чувашская.

Ні фіга. Днямі пазнаёміўся ў чаце з туркам, які вучыў расейскую філалогію ў Алма-Аце. Кажа, ён з выгляду падобны да казаха, дык напачатку да яго там усе загаворвалі па-казахску, а бачачы, што ён не разумее і ня можа толкам адказаць, крыўдзіліся. Бо, кажа, казахская і турэцкая падобныя як расейская і польская, а ўзаемазразумелыя з турэцкай -- туркменская, гагаузская і азербайджанская (азеры, ён сказаў). Кумыкскую, якая належыць да тае ж групы, не назваў.

Так зьвяргаюцца ідалы (с).

Новыя кнігі

Virginie Symaniec et Alexandra Goujon. Parlons bie/lorussien. Langue et culture. L'Harmattan, Paris, 1977. ISBN: 2-7384-5844-0. 380 pp.

Моўная частка займае сс. 47-157, ахоплівае фанэтыку, марфалогію назоўніка, прыметніка і дзеяслова, плюс заўвагі пра лексыку і дыялекталогію. Яшчэ 20 старонак -- размоўнік. Ёсьць французска-беларускі, беларуска-французскі слоўнічкі і калекцыя бел. мастацкіх тэкстаў з фр. перакладамі. Куча інфармацыі па-французску пра гісторыю і культуру Беларусі. Правапіс пасьлядоўна ня вытрыманы -- поруч сустракаюцца напісаньні наркомаўкай і тарашкевіцай -- і неверагодная колькасьць памылак друку і ня толькі: у моўнай частцы -- на кожнай другой старонцы, калі не часьцей.

Holger Knauf. Weissrussisch (Belarus) -- Wort fuer Wort. Kauderwelsch Band 145. Reise Know-How Verlag Peter Rump GmbH, Bielefeld. 2001, 176 pp. ISBN 3-89416-552-9.

Памылак значна менш, хоць таксама сустракаюцца. Кампактная і з густам выдадзеная кніжка.

L'occitan tout de suite! par Jo\rdi Escartin. Pocket/Langues pour Tous, Paris, 2002. 159 pp. ISBN: 2-266-11444-1.

Кампактны і прыемны падручнік і разам даведнік па аксітанскай мове (на ёй гаварылі, але ўжо амаль не гавораць, на поўдні Францыі).

В.Ф.Суханов. Китайско-русский тематический словарь 3000 наиболее употребительных слов. М., Экономика, 2001, 309 сс. ISBN: 5-282-02111-0.

Словы расстаўлены паводле часьцін мовы, усярэдзіне іх паводле тэмаў. Асабліва каштоўныя сьпісы службовых словаў і ветлівых выразаў. У аснове -- "Словасьпіс 3000 найчасьцей ужываных словаў кітайскай літаратурнай мовы" (Камітэт па рэформе кітайскага пісьма, 2 выд., 1987). Прадмова абяцае, што гэтыя 3000 пакрываюць 80% усіх сучасных тэкстаў.